فيكارو الدعم على واتساب

دليل لوحة الطلبات

كل اللي تحتاجه عشان تدير موقع محلك بنفسك، خطوة بخطوة.

الدخول للوحة

  1. افتح رابط لوحتك اللي وصلك (ينتهي بـ /admin).
  2. اكتب الإيميل وكلمة السر واضغط دخول.
  3. نسيت كلمة السر؟ اكتب إيميلك واضغط نسيت كلمة السر؟، ويوصلك رابط تغيرها منه.

استقبال الطلبات

  1. من تبويب الطلبات يطلع لك كل طلب جديد فوراً مع صوت تنبيه.
  2. غيّر حالة الطلب بالأزرار: ابدأ التحضير ثم جاهز ثم تم التسليم. الزبون يشوف الحالة في صفحة التتبع حقته.
  3. تقدر تتصل بالزبون أو تراسله على واتساب من بطاقة الطلب، وتطبع فاتورة للمطبخ بزر طباعة.
  4. الطلبات المدفوعة أونلاين تطلع بعد ما يكتمل الدفع، ومكتوب عليها مدفوع أونلاين.

مهم: اللوحة وهي مفتوحة تطلّع صوت مع كل طلب. ولو بتقفلها، فعّل التنبيه على الجوال عشان ما يفوتك طلب.

تنبيه الطلبات على جوالك (واللوحة مقفلة)

  1. افتح اللوحة من الجوال اللي تبي يجيك عليه التنبيه.
  2. في تبويب الطلبات، اضغط فعّل التنبيه.
  3. يطلع لك سؤال من الجوال، اضغط سماح.
  4. اضغط جرّب التنبيه وقفّل شاشة الجوال، ولازم يطلع لك تنبيه خلال ثواني.

الحين مع كل طلب جديد يطلع لك تنبيه فيه رقم الطلب ونوعه والمبلغ، حتى لو اللوحة والمتصفح مقفلين. اضغط عليه وتفتح اللوحة على طول. تقدر تفعّله على أكثر من جوال (لك وللكاشير).

في الآيفون: لازم تثبّت اللوحة أول (الطريقة هنا)، وتفتحها من الأيقونة اللي على الشاشة الرئيسية، وبعدها فعّل التنبيه. يشتغل على iOS 16.4 وأحدث.
في أندرويد: لو ما وصلك، شيّك إن إشعارات Chrome (أو Samsung Internet) مسموحة من إعدادات الجوال، وإن وضع توفير البطارية ما يقفل المتصفح.

فتح وقفل المحل

نقاط الولاء

  1. من تبويب المطعم، في نقاط الولاء: اكتب كل كم طلب (مثلاً 5) والمكافأة (مثلاً قهوة مجانية)، واضغط احفظ.
  2. صفحة محلك تكتب للزبائن "كل 5 طلبات: قهوة مجانية".
  3. في تبويب الزبائن اضغط استحقوا مكافأة، وعند كل زبون اضغط أرسل المكافأة، ويفتح الواتساب والرسالة جاهزة.

الزبون ينحسب برقم جواله، فلازم يطلب بنفس الرقم كل مرة. ولما يطلب طلبه الجاي، اعطه المكافأة.

بكسل الإعلانات

لو تعلن في سناب أو تيك توك أو إنستقرام: من مدير الإعلانات في المنصة انسخ Pixel ID، والصقه في تبويب المطعم ← بكسل الإعلانات واضغط احفظ. بعدها المنصة تعرف كم واحد زار صفحتك وأضاف للسلة وطلب، وتقدر تشوف إعلانك جاب كم طلب.

حسابات الموظفين (الكاشير)

  1. من تبويب المطعم، في حسابات الموظفين، اكتب إيميل الموظف واضغط + أضف موظف.
  2. يوصل الموظف إيميل يحدد فيه كلمة سره (يشيك على الـ Spam لو ما لقاه)، وإنت أرسل له رابط اللوحة (يطلع تحت القائمة).
  3. الموظف يشوف الطلبات بس: يغيّر حالتها ويطبع الفاتورة ويوقف الطلبات لو مزحومين، ويقدر يفعّل التنبيه على جواله. وما يقدر يعدّل القائمة ولا الأسعار ولا يشوف التقارير والزبائن.
  4. موظف ترك الشغل؟ اضغط شيله وما عاد يقدر يدخل.

الزبائن والعروض

  1. تبويب الزبائن يطلع كل زبون طلب منك: كم طلب، وكم صرف، وآخر مرة طلب.
  2. الفلاتر: رجعوا أكثر من مرة (زبائنك الدايمين)، وما طلبوا من شهر (رجّعهم بعرض).
  3. اكتب رسالة العرض فوق، واضغط أرسل العرض عند الزبون، ويفتح الواتساب والرسالة جاهزة باسمه.
  4. نزّل القائمة يعطيك ملف يفتح في Excel.

مهم: زر العرض يطلع بس للزبون اللي اختار "أبي يوصلني عروض المحل" وقت الطلب، لأن نظام حماية البيانات الشخصية يمنع إرسال تسويق لأحد ما وافق.

المحل مزحوم ووقت التجهيز

  1. في تبويب الطلبات، كرت المحل مزحوم؟: اضغط وقّف الطلبات 20 دقيقة أو ساعة، والموقع يقول للزبائن إنكم مزحومين ويرجع يستقبل لحاله بعد الوقت.
  2. تبي ترجعها قبل؟ اضغط رجّع الطلبات الحين.
  3. اختر وقت التجهيز، والزبون يشوف "طلبك يجهز خلال ~ دقيقة" قبل وبعد ما يطلب.

رسوم التوصيل حسب الحي

من تبويب المطعم، في الطلب والتوصيل، افتح رسوم توصيل حسب الحي واضغط + حي لكل حي توصل له مع رسومه، وبعدها احفظ. الزبون يختار حيّه وتنحسب رسومه، وما يقدر يطلب توصيل لحي مو في القائمة.

الطلب من الطاولة

  1. من تبويب المطعم، اكتب عدد الطاولات واضغط احفظ.
  2. اضغط اطبع ملصقات الطاولات، كل طاولة لها ملصق برقمها.
  3. الزبون يصوّر الملصق ويطلب، والطلب يوصلك مكتوب عليه طاولة رقم كذا، وما يحتاج يكتب جواله.

الطلب المجدول

فعّل الزبون يقدر يجدول طلبه من تبويب المطعم. الزبون يختار وقت الاستلام (كل نص ساعة لين يومين، وبس داخل وقت دوامك)، حتى لو المحل مقفل الحين. والطلب يطلع لك في اللوحة مكتوب عليه مجدول والوقت.

الفاتورة الضريبية

لو محلك مسجل في ضريبة القيمة المضافة، اللوحة تطلع لك فاتورة ضريبية مبسطة لكل طلب، فيها الرقم الضريبي ورقم فاتورة متسلسل والضريبة 15% ورمز QR حسب متطلبات هيئة الزكاة والضريبة والجمارك.

  1. من تبويب المطعم، في خانة الفاتورة الضريبية، اكتب رقمك الضريبي (15 رقم يبدأ وينتهي بـ 3، تلقاه في شهادة التسجيل).
  2. اكتب اسم المنشأة زي ما هو في الشهادة (لو يختلف عن اسم المحل)، واضغط احفظ.
  3. من تبويب الطلبات اضغط الفاتورة على أي طلب، وتطلع جاهزة للطباعة على طابعة الكاشير أو كـ PDF.

مهم: أسعار قائمتك لازم تكون شاملة الضريبة، والفاتورة تحسب الضريبة من الإجمالي. وكل طلب ياخذ رقم فاتورة واحد بس حتى لو طبعته أكثر من مرة. والطلب الملغي ما يطلع له فاتورة. ولو ألغيت طلب بعد ما طبعت فاتورته، احتفظ بنسخة منها وكلّم محاسبك عن إشعار دائن (اللوحة ما تطلعه للحين). وزر الفاتورة هو نفسه زر الطباعة، فأي طباعة للطلب تعطيه رقم فاتورة.
هذي الفاتورة تغطي المرحلة الأولى من الفوترة الإلكترونية (الإصدار). لو وصلك إشعار من الهيئة إن منشأتك لازم تنربط بمنصة فاتورة (المرحلة الثانية)، كلمنا قبل الموعد.

أكواد الخصم

  1. من تبويب المطعم ← أكواد الخصم ← + كود خصم جديد.
  2. اكتب الكود بالإنجليزي (مثل WELCOME)، واختر نسبة أو مبلغ ثابت، وأقل طلب لو تبي.
  3. اضغط احفظ، وانشر الكود في حساباتك. الزبون يكتبه في السلة وينزل الخصم لحاله.
  4. تبي توقفه؟ شيل علامة شغّال.

انتبه: الأكواد مو سرية، أي أحد عنده الكود يقدر يستخدمه. لا تسوي كود بخصم كبير وتعطيه لشخص واحد بس، واقفل الكود أول ما تخلص الحملة.

ملصق QR للطاولات

  1. من تبويب المطعم ← ملصق الطلب (QR) ← اطبع ملصق QR.
  2. يفتح لك ملصق جاهز باسم محلك وشعاره. اضغط اطبع أو احفظ PDF.
  3. اطبعه وحطه على الطاولات والكاشير والباب. الزبون يصوّره بكاميرا جواله ويطلب.

التقييمات في قوقل

بعد ما يستلم الزبون طلبه، تطلع له في صفحة تتبع الطلب زر قيّمنا في قوقل. التقييمات الكثيرة تخلي محلك يطلع أعلى في قوقل ماب.

  1. افتح تطبيق Google Maps وادخل بحساب قوقل اللي مسجّل فيه محلك، واضغط صورتك فوق ← نشاطك التجاري (Your business).
  2. اختار اطلب تقييمات (Ask for reviews) وانسخ الرابط (يبدأ بـ https://g.page/r/).
  3. في اللوحة: تبويب المطعم ← الروابط ← الصق الرابط في رابط التقييم في قوقل واضغط احفظ.

وفي نفس التبويب اكتب عنوان المحل (الحي والشارع)، يطلع للزبائن في الموقع ويساعد قوقل يعرف وين محلك.

القائمة بالإنجليزي

  1. في كل صنف افتح بالإنجليزي (اختياري) واكتب الاسم والوصف بالإنجليزي. ولكل قسم فيه خانة English جنب اسمه.
  2. أول ما تكتب اسم إنجليزي وتحفظ، يطلع للزبائن زر English فوق في الموقع.
  3. الطلب يوصلك بالعربي دايماً، حتى لو الزبون طلب بالإنجليزي.

التقارير

من تبويب التقارير تشوف مبيعات اليوم وآخر 7 أيام وآخر 30 يوم، وعدد الطلبات، ومتوسط الطلب، والأصناف الأكثر طلباً.

وفوق التقارير ملخص الشهر الماضي: عدد الطلبات والمبيعات ومتوسط الطلب والصنف الأكثر طلباً، والنسبة مقارنة بالشهر اللي قبله. وأول أسبوع من كل شهر يطلع لك تنبيه بالملخص في تبويب الطلبات.

ثبّت اللوحة كتطبيق

تحتاج مساعدة؟

راسلنا على واتساب وارسل لنا صورة الشاشة اللي فيها المشكلة: الدعم على واتساب.