الشروط وسياسة الخصوصية

آخر تحديث: أكتوبر 2026

من نحن

فيكارو خدمة في الرياض تسوي للمطاعم والكافيهات مواقع طلبات خاصة فيها، مع لوحة تحكم لاستقبال الطلبات وإدارتها.

نجهّز للمحل موقع طلبات ولوحة تحكم، ونستضيفها ونحدّثها طول فترة الاشتراك.
المحل هو اللي يحدد أسعاره وأصنافه وأوقات دوامه، وهو المسؤول عن صحتها وعن جودة الطلب وتوصيله.
نسعى إن الخدمة تشتغل طول الوقت، بس ممكن تتوقف أحياناً لصيانة أو لعطل عند مزوّدي الخدمة. وفي هالحالة يقدر الزبون يطلب من المحل مباشرة على واتساب.

الاشتراك شهري أو سنوي حسب الباقة المتفق عليها، ويُدفع مقدّماً. السنوي بسعر 10 أشهر.
الدفع أونلاين من صفحة الاشتراك بمدى أو فيزا أو ماستركارد عن طريق ميسّر، أو بتحويل بنكي.
التجديد التلقائي: لو دفعت أونلاين، الاشتراك يتجدد تلقائياً بنفس المبلغ في نهاية كل فترة (شهر أو سنة) من نفس البطاقة، لين تلغي التجديد. ولو ما نجح الخصم نحاول 3 أيام، وبعدها نتواصل معك.
تقدر توقف التجديد التلقائي بنفسك وقت ما تبي من رابط "إدارة الاشتراك" اللي يطلع لك بعد الدفع، أو تطلب منا على واتساب أو الإيميل.
ما ناخذ أي نسبة أو عمولة على طلبات المحل.
إذا تأخر الدفع، ممكن نوقف الموقع مؤقتاً لين يتجدد الاشتراك. وبيانات المحل تبقى محفوظة.

اشتراك المحل في فيكارو:

قبل تسليم الموقع: لو ألغى المحل الاشتراك قبل ما نسلّمه الموقع، يرجع له المبلغ كامل.
لو تأخرنا: لو ما سلّمنا الموقع خلال يومين عمل من استلام الدفع وبيانات المحل (القائمة والصور)، يحق للمحل يلغي ويسترد المبلغ كامل.
بعد تسليم الموقع: يقدر المحل يلغي الاشتراك (ويوقف التجديد التلقائي) وقت ما يبي بدون أي رسوم، ويستمر الموقع شغّال لين نهاية الفترة المدفوعة، وما يتجدد بعدها. وما فيه استرداد للشهر (أو السنة) اللي بدأت.
لو انخصم تجديد وما كنت تبيه: راسلنا خلال 3 أيام من الخصم ونرجّع لك مبلغ التجديد كامل ونوقف الاشتراك.
طريقة الإلغاء أو طلب الاسترداد: راسلنا على واتساب أو الإيميل (تحت في قسم التواصل) باسم المحل. نرد خلال يوم عمل، ويرجع المبلغ المستحق بنفس طريقة الدفع خلال 7 أيام عمل من الموافقة.

طلبات الزبائن من مواقع المحلات:

المحل هو البائع والمسؤول عن الطلب، فإلغاء الطلب أو استرجاع مبلغه يكون عن طريق المحل نفسه (تواصل المحل موجود في صفحة المحل وصفحة تتبع الطلب).
لو الطلب مدفوع أونلاين وانلغى أو ما وصل، المحل يرجّع المبلغ من حسابه في بوابة الدفع لنفس البطاقة، ويوصل عادة خلال 14 يوم عمل حسب البنك.
لو ما قدرت توصل للمحل، راسلنا ونساعدك تتواصل معه.

الدفع الأونلاين يتم عن طريق حساب المحل الخاص في بوابة الدفع (ميسّر)، والفلوس تروح لحساب المحل مباشرة. فيكارو ما تستلم ولا تحتفظ بفلوس الطلبات.
بيانات البطاقات يدخلها الزبون في نموذج بوابة الدفع، وما تمر علينا ولا نحفظها.
في اشتراكات المحلات، ميسّر يحفظ البطاقة بشكل مشفّر ويعطينا رمز (توكن) نجدد فيه الاشتراك بس، وما نقدر نشوف رقم البطاقة. ولما تلغي التجديد نمسح الرمز.

لما الزبون يطلب، نحفظ البيانات اللازمة لتنفيذ طلبه بس:

الاسم ورقم الجوال.
عنوان التوصيل أو وصف السيارة، وأي ملاحظات يكتبها. ولو ضغط "حدد موقعي" ووافق، نحفظ موقعه (الإحداثيات) مع الطلب عشان يوصله المندوب.
تفاصيل الطلب والمبلغ وطريقة الدفع ووقت الطلب.

نستخدمها عشان يوصل الطلب للمحل، ويتواصل المحل مع الزبون، ويتابع الزبون حالة طلبه.
يشوفها المحل اللي طلب منه الزبون فقط، وفريق فيكارو عند الحاجة للدعم الفني.
ما نبيعها، وما نشاركها مع أي جهة للتسويق.
البيانات محفوظة على خدمات Google Firebase في مركز البيانات بالدمام، مع قواعد حماية تمنع أي أحد غير المحل من قراءة طلباته.

نحتفظ بالطلب وبيانات الزبون فيه 12 شهر من تاريخ الطلب، عشان المحل يرجع لها في التقارير والمشاكل، وبعدها تنحذف تلقائياً.
نأخذ نسخة احتياطية يومية لقوائم المحلات وإعداداتها فقط، وما فيها بيانات الزبائن ولا طلباتهم.

تقدر تطلب نسخة من بياناتك أو حذفها، عن طريق المحل اللي طلبت منه أو بالتواصل معنا على واتساب.

لأي سؤال عن هالشروط أو الاشتراك أو الاسترجاع أو بياناتك: